ಅಂಚಿನವುಲಾ ಒಂಜಿ ಕಾಲ ಇತ್ತುಂಡುಗೆ, ಅಪಗದ ಜವನೆರ್ ನೆಲನ್ ಕೈಟ್ ಗುದ್ದುದು ನೀರ್ ದೆತ್ತೊಂದಿತ್ತೆರ್ಗೆ ! ಕಲಸೆ ಬಜಿಲ್ ಕೈಲ್ ಬನ್ನಂಗಾಯಿ ತಿಂದ್, ಚರ್ಗೆಡ್ ಪೇರ್ ಪರ್ದ್ ಬಲವುದ ಕುದ್ಪೆ ಬೆಂಜನೊಡು ಬಲದಿ ಜೀವೊಲು. ಬೆನ್ನಿದ ಕಲೊಟು ಕೆಸರ ಕಂಡೊಡು ರಟ್ಟೆ ಪೊಲ್ತು ಗೆಟ್ಟೆ ಪೊಡಿರಟ್ಟಾದ್ ಬಂಗಾರ್ ಬುಲೆ ಬುಲೆವೊಂದಿತ್ತಿನ ಕಾಲ !
ಒರಿಯತ್ ಇರ್ವೆರತ್ ಕೆಲೆವೆರಿತ್ತೆರ್ಗೆ ಇಂಚಿನ ಬಿಂಕದ ತಂಕದ ಜವನೆರ್ ನಮ್ಮ ತುಳುನಾಡುಡ್ ! ಆಂಡಲಾ ರಟ್ಟೆದ ತಾಕತ್ತ್ ಎಡ್ಡೆಗೆತ್ತಾದ್ ತುಳುನಾಡುಡ್ ಪುದರಾಯಿನಾಯೆ ಒರಿಯೇ , ಆಯೆ ತೇಲಾರ್ ಗುತ್ತುದ ಬಗ್ಗಣ್ಣ ಅಡ್ಯಂತಾಯೆರೆನ ಅರ್ವದೆ ಮಂಜಣ್ಣೆ !.
ಬಗ್ಗಣ್ಣ ಅಡ್ಯಂತಾಯೆರೆನ ಮೋಕೆದೊಸರುಗ್ ಒರ್ತೆ ತಂಗಡಿ ದುಗ್ಗೆ . ಪೊರ್ಲಾ ಕೇದಗೆ ದುಗ್ಗು ಪ್ರಾಯೊಗು ಬನ್ನಗ ಬಗ್ಗಣ್ಣ ಅಡ್ಯಂತಾಯೆರ್ ಗುತ್ತುದ ಇಲ್ಲದ ದುಗ್ಗೆನ್ ಕಟ್ಲ ಬರ್ಕೆದ ನಾರಾಯಣ ಶೆಟ್ರೆನ ಬಾಳಿಕೆದ ಇಲ್ಲಗ್ ದಾರೆ ಮಯ್ತ್ ಕೊರ್ಪೆರ್.
ಬಾಳಿಕೆದ ಇಲ್ಲ್ ಗುತ್ತುದಿಲ್ಲಡ್ದು ಗತ್ತುಗೊಂತೆ ತಿರ್ತಾ೦ಡಲ ದುಗ್ಗೆ ನಾರಾಯಣ ಶೆಟ್ರೆ ನೊಟ್ಟುಗು ಸುಖ ಸಂತೋಸುಡು ದಿನ ದೆಪ್ಪುವಲ್ . ದುಗ್ಗೆಗ್ ಮದ್ಮೆ ಆದ್ ಪ್ರಾಯ ಇರ್ವ ಕರಿಂಡಲ ಜೋಕುಲಾಪುಜಿಗೆ. ಪರಕೆ ಪಂಡಿನ ಮಾತಾ ಪೊಯ್ಯೊಡು ಪೋಂಡು !. ಕಡೆಕ್ ಬಪ್ಪನಾಡುದ ಅಪ್ಪೆ ದುರ್ಗೆಗ್ ಬಂಗಾರ್ದ ಬಾಲೆ ಬೊಲ್ಲಿದ ತೊಟ್ಟಿಲ್ ಒಪ್ಪುವೆ ಪಂಡಿನ ಪರಕೆಡ್ ಪುಟಿನಾಯೆ ಈ ಮಂಜಣ್ಣೆ !
ಮಂಜಣ್ಣನ ಕತೆ ತೆರಿಯಂದಿ ತುಳುವೆ ಊರುಡುಪ್ಪಯೆ ! ಅವುಲಾ ನಮ ಬಂಟ ಜವನೆರೆಗ್ ಮಂಜಣ್ಣೆ ಒಂಜಿ ಗಂಧದ ಕುದಡೆ !ತರೆತಿನಾತ್ ಪರಿಮಲ !!
ನಮ ಮೂಲು ತೆರಿಯರೆ ಪಿದಾಡ್ದಿನಿ ಮಂಜಣ್ಣನ ಕತೆತ ಸಾಂಕಣೆದ ಗುಣ ನಡೆತದ ವಿಚಾರ !
ಬಲ ಭೀಮನ ಮಗೆ ಘಟೋತ್ಕಚಗ್ ಅಪ್ಪೆನ ಒಂಜಿ ಅಪ್ಪಣೆ ಉಪ್ಪುಂಡು . ತನ್ನ ವನಸ್ ಗ್ ದಿನಕ್ಕೊಂಜಿ ನರಮಾನಿ ಕನಪಿ ಕೆಲಸ. ಇಂಚನೇ ನಾಡೊಂದು ಪೋನಗ ಒಂಜಿ ದಿನ ಕಾಡ ಸಾದಿಡ್ ಪೂಜೆದ ಪಾಪದ ಭಟ್ರು ತಿಕ್ಕುವೆರ್ . ಅಪಗ ರಕ್ಕಸೆ ಕೇನುವೆ '' ಭಟ್ರೇ ... ಎನ್ನ ಅಪ್ಪೆನ ವನಸುಗ್ ಇನಿ ಈರ್ ಬರೋಲಿಯಾ ?''
ಬಿರಣೆ ಸೋದ್ಯೋಡು ಕೇನುವೆರ್ '' ಈ ರಕ್ಕಸೆ , ಬಲವಂತೆ , ಎನನ್ ಒಯ್ತು ಕೊನಪಿನ ಬುಡ್ದು ನಟೊಂದು ಕೇನುವತ, ದಾಯೆಗ್ ?'
ಘಟೋತ್ಕಚೆ ಅಪಗ ಪನ್ಪೆ ''ಯಾನ್ ರೂಪೊಡು ರಕ್ಕಸೆ ಆಂಡ ಎನ್ನ ಮೈಟ್ ಪರಪ್ಪುನು ಭೀಮಸೇನನ ನೆತ್ತೆರ್ ! ಭೀಮನ ನೆತ್ತೆರ್ ಪಟ್ಟೊನಿನ ಯಾನ್ ಬಲ ದಾಂತಿನಕಲ ಮೈಕ್ ಕೈ ಪಾಡುನ ದೇವೆರೊಪ್ಪುವೆರಾ ? !''
ಬಲ ಇತ್ತುಂಡಲಾ ಬಲವಂತನ ಮಿತ್ ಮಾತ್ರ ಬಲ ಪ್ರಯೋಗ ಮಲ್ಪೊಡು ! ಉಂದು ಸತ್ಯ ಕಾಲದ ನಡಕೆ !
ಇಂಚಿನನೇ ನಡಕೆನ್ ಬಗ್ಗಣ್ಣ ಅಡ್ಯಂತಾಯೆರ್ ಜವ್ವನೊಡು ಉರ್ಕರೊಂದಿಪ್ಪನಗ ಮಂಜಣ್ಣಗ್ ಕಲ್ಪ ಕೊರ್ಪಿನ ನಲಿಕೆನ್ ದೂಮಪ್ಪ ಮಾಸ್ಟ್ರು ತನ್ನ ಅಗೋಳಿ ಮಂಜಣ್ಣ ಪಾರ್ದೋನೊಡು ತೆರಿಪ ಕೊರ್ಪಿನ ಪೊರ್ಲುನು ತೆರಿದೇ ತೆರಿಯೊಡು.
ಪದಿನಾಜಿ ವರ್ಷೋಗೇ ಮಂಜಣ್ಣೆ ಜಕ್ಕ ಜವನೆ . ಬಡವು ಬಾಜೆಲ್ ಪಂದ್ ತೋಟದಂಚಿ ಮಿನಿ ಪೋಯೆಡ ಕೈಲ್ ಕೈಲ್ ಬೊಂಡ ಬನ್ನಂಗಾಯಿ ಕಡ್ತ್ ಪೊಡಿ ಪೊಡಿ ಮಲ್ಪೆಗೆ ! ಬಂಜಿ ತೂವೊರ ಲಕ್ಕಿನಾಂಡ ಇಡೀ ಮೂಜಿ ಪೆಲಕಾಯಿ ತಿನುವೆಗೆ , ಗೊಂಟು ತಾರಾಯಿ ಒರಾನೆ ಇರ್ವತ್ತೈನ್ ಬಾಯಿಡ್ ಗಾಣ ಗೂರುವೆಗೆ ! ಕಟ್ಟದ ಕೋರಿದ ಕಜಿಪುಡು ಬಿಸಲೆ ಕೈತಲ್ ದೀದ್ ವನಸ್ ಗ್ ಕುಲ್ಯೆಡ ನುಪ್ಪುದ ಮಲ್ಲ ಅಗೊಳಿಲಾ ಖಾಲಿಗೆ !
ಮಾಮಣ್ಣನ ಇಲ್ಲಡ್ ಈತ್ ಮಾತಾ ಬೋಡಾ ಬೊಡ್ಚ್ಯಾ ತಿಂದುಂಡಲಾ ಮಂಜಣ್ಣಗ್ ಅಪಗಪಗ ತನ್ನ ಊರು ಕಟ್ಲದ ಅಪ್ಪೆ ದುಗ್ಗಿನ ನೆನಪಾವುಗೆ ! ಅಪ್ಪೆನ ಕೈ ಬಲಸೆ ಅಂಚನೆ ! ''ತಿನ್ ಮಗಾ '' ಪಂದ್ ಅಪ್ಪೆ ದುಗ್ಗೆ ಬಲಸಿನಾನಿ ಮಾತ್ರಾ ಮಂಜಣ್ಣಗ್ ಬಂಜಾರದ ''ಆಡಿಗೆ'' ಪೋಪಿನಿಗೆ !
ಅಪ್ಪೆ ದುಗ್ಗಿ ಬಳಸುದುವೊಲುಡ , ಕಾರ್ಲದ ಬಾಕಿಮಾರ್ ಕಂಗಣ ಆತುಂಡ, ಕೊಡಂಜೆದ ಕಲ್ ಉಡರ್ಗ್ಯೆ ಆತುಂಡ, ರಾಮ ಸಮುದ್ರದ ನೀರ್ ಪೇರ್ ಆತುಂಡಾ ಎನ್ನ ಬಂಜಿ ಬಂಜಾರ ದಿಂಜಿದುವೋ ದಾನ್ಯೋ ಪನ್ಪಿನ ಅಂಗಲಾಪುದ ಅಂಗುದ ಜವನೆ ಮಂಜಣ್ಣೆ ಜಾಲ್ ಜತ್ತೆಡ ಜೋಕುಲು ಮರ್ಲ್ ಕಟೊಂದು ಪೆರ್ಚಿಕಟುದು ನಲ್ಪೆರ್ಗೆ, ಜವನೆರ್ ಕೈ ಕಟೊಂದು ಪಿರಾವೆ ಮುಂಡೆ ಬಗ್ಗಾವೊಂದು ಬರುವೆರ್ಗೆ !
ಮಂಜಣ್ಣೆ ಜಾಲ್ ಜತ್ತುದು ಬೈಲ ಕಂಡದಂಚಿ ನಡತೊಂದು ಪೋಯೆಡ ತೂಪಿನೈಕ್ ಪತ್ತ್ ಕಣ್ಣುಲು ಯಾರಂದುಗೆ !
ನಟ್ಟ ಬೆರಿ ,ಗಟ್ಟಿ ಬಂಜಿದ ಲಟ್ಟ ಜವನೆ ಮಂಜಣ್ಣೆ !!
ಲೆತ್ತಿನಂದುಡ ಗಾವು ಕೇನುಂಡು ತೆಲ್ತಿನಂದುಡ ತೆಡಿಲ್ ಮುರೆಸುಂಡು
ಬೋಲೆ ಕಣ್ಣೊರ ಮರೆತೇಡಾಂಡ ಭೂತ ಪತುದಿನ ಪಿರಿಯುಂಡು !!
ಮುಡುಟು ಕುಟುದೇ ಮುನ್ನೂದು ತಾರಾಯಿ ತಲ್ತ್ ದೆತ್ತುದು ಬೆರೆಲ್ ಶೆಡ್ಡಿದ್ ದರ್ಪೆಗೆ ! ಕೊದಂಟಿ ದಾಂತೆ ಅರಿತ ಮುಡಿ ಕಟ್ಟುನಾಯೆ ಮಂಜಣ್ಣೆ ಖಾಲಿ ಕೈ ತಟ್ಟುಡೇ ಪಾದೆ ಕುಟುದು ಪೊಡಿ ಮಲ್ಪೆಗೆ !
ಖಾಲಿ ಕೈಟ್ ಪಿಲಿಟ ಉರ್ಡುದು ಗುದ್ದು ಗುದ್ದುದು ಕೆರ್ತೆಗೆ !
ಅಂಚಿನ ಬಲ ಭೀಮೆ ಮಂಜಣ್ಣಗ್ ತಿಗಲೆ ಗಂಟೆ ಜವನೆರ್ ಸದ್ರು ಗುಂತೆರೆ ಆವಂದೆ ದೂರೊಡುಂತೊಂದೇ '' ಆಯೆ ಮಲ್ಲ ಗಡಾಯಿ ಕಲ್ಲುಂದು'' ತಾದಿ ಬದಿಯೇ ಮನಿಪಂದೆ ಪೋವೆರ್ಗೆ !
ಇಂಚಿತ್ತಿ ತಂಕದ ಜವನೆ ಮಂಜಣ್ಣ ನ್ ಬಗ್ಗಣ್ಣ ಅಡ್ಯಂತಾಯೆರ್ 'ಊರುಗು ಮಾರಿ'ಯಾವಂದಿಲೆಕ್ಕ ಬುಲೆಪಾಯಿನ ನೀತಿ ರೀತಿದ ಪಾಟೊನು ಧೂಮಪ್ಪ ಮಾಸ್ತೆರ್ ಬಾರಿ ಪೊರ್ಲುಡೇ ನಂಕ್ ಕಟುದು ಕೊರ್ತೆರ್ !
ನಮ ಮೂಲು ಪನರೆ ಪಿದಾಡ್ದಿನಿ ಊರು ತೆರಿದಿನ ಅಗೋಳಿ ಮಂಜಣ್ಣನ ಬಿರ್ಸ ಕತೆನತ್ ! ಬಗ್ಗಣ್ಣ ಅಡ್ಯಂತಾಯೆರ್ ತನ್ನ ಜಟ್ಟಿ ಜಕ್ಕ ಜವನೆ ಅರ್ವದೆ ಮಂಜಣ್ಣ ನ್ ನುರ್ತಿ ನರ್ತೆಡ್ ಎರ್ತೆ ಏರಂದಿಲೆಕ್ಕ ಬುದ್ದಿ ಬಲಕೆಡ್ ಅರ್ಥ ದಿಂಜದ್ ಸಾಂಕುದಿನ ಪೊರ್ಲುನು !
ಇಲ್ಲದ ಕಾಟುಲೆಗ್ ಬೈಪಣೆಟ್ ಬಾಯಿ ಆಡದ್ ಕಾಯಿ,ಕಡೆವೆರೆ ಬೈ ದಾಂತಿನ ತೂಯಿನ ಬಗ್ಗಣ್ಣೆ ಮಂಜಣ್ಣಡ ಪಂಜದ ಇಲ್ಲಗ್ ಪೋದು ಸಲಾಯಿ ಬೈ ಕನವರೆ ಪನ್ಪೆರ್ . ಮಂಜಣ್ಣನ್ ದೂರೊಡೇ ತೂಯಿನ ಪಂಜ ಗುರ್ಕಾರೆ ಆಯನ್ ವನಸುಗ್ ನಾನಾ ಲೆಕ್ಕ ಕೊರೆರಾವಂದ್ ಪಂದ್, ಲೆಪ್ಪಂದೆ ಮೋನೆ ತಿರ್ಗಾದ್ ''ಬೈ ಬೋಡಿತ್ತುಂಡ ಮುಟ್ಟೇಡುಂಡು, ಕಟೊಂದು ಪೋವೊಲಿ'' ಪಂಡುದ್ ಉಲಾಯ್ ಪೋಪೆ . 'ಕಲ್ಪವೆ ನಿಕ್ಕ್ ' ಪಂದ್ ತಂಕದ ಮಂಜಣ್ಣೆ ಬೈತ್ತ ಪೊದಿಕೆಡ್ ಪತ್ತ್ ಮೂಡಿ ಅರಿನ್ ಸೇರಾ ಕಟುದು ತಾನೇ ದೆರ್ತ್ ತುಂಬುದು ತೇಲಾರ್ ಗುತ್ತುದ ಇಲ್ಲ ಜಾಲುಡ್ ಪಾಡ್ದು ಬಗ್ಗಣ್ಣಗ್ ವಿಶಯ ತೆರ್ಪಾವೆ !.
ಮಾನ ಮರ್ಯಾದಿ ತೆರಿಯಂದಿ ಪಂಜದಾಯನ ನಡಕೆ ತೆರಿದ್ ಕಿರಿ ಕಿರಿ ಆಯಿನ ಬಗ್ಗಣ್ಣೆ ಮಂಜಣ್ಣ ನ್ ಕುಲ್ಲದ್ ಸೋಕುದ ನಾಲ್ ಪಾತೆರ ಪನ್ಪೆರ್. ಬೆಚ್ಚ ನೆತ್ತೆರ್ ಪರಿಪು ಜವನೆರ್ ಕೆಬಿನ್ ಕೊಂಡೆ ಮಲ್ತು ಕೆನೋಡಾಯಿನ ಪೇರ್ -ನೀರ್ ಸೇರಿನ ಭಾವೆ ದಿಂಜಿನ ಗಟ್ಟಿ ತೂಕದ ತಿರ್ಲ ಮದಿಪುಲು !
''ಬತ್ತಿನಾಯನ್ ಒಟ್ಟು ಕುಲ್ಲದ್ ಪಟ್ಟ್ ತಿನೊಡು ಮಂಜಣ್ಣ
ಆತ್ ಪಿನಂದಿನಾಯೆ ನರಮಾನ್ಯತ್ ಮಲ್ತ್ ತಪ್ಪುನು ತೆರಿಯೊಡು !''
ನಿನ್ನ ವನಸುದ ಕತೆನ್ ಕೇಂದ್ ಆಯೆ ನಿನನ್ ತಪ್ಪದ್ ಪುಚ್ಚೆ ಕಣ್ ಮುಚಿದ್ ತಿಂದಿಲಕ್ಕ ತಿನಿಯೆನಾ ? ಆಯೆಲಾ ಒರಿ ನರಮಾನ್ಯಾ ?
''ಬತ್ತಿನಾಯನ ಕಷ್ಟ ಸುಖೋನು ದುಂಬು ಕೇಂಡ್ ತೂವೊಡು
ಅಸರ್ ಬೇಸರ್ ಅತಿನಂದ್ ಡ ಬೆಲ್ಲ ನೀರ್ ಕಂತ್ ದೀಯೊಡು !''
ಮಂಜಣ್ಣಗ್ ತುಳುವ ನಾಡುದ ಭಿನ್ನ ಮಾನಾದಿಗೆನ್ ಬಗ್ಗಣ್ಣೆ ಬುಡ್ಪ ಪಂಡ್ ತೋಜಾವೆರ್ .
''ಉನ್ಪಿ ಸಮಯೊಡು ಬತ್ತಿನಾಯನ್ ಇತ್ತಿನೈಟ್ಟೆ ಸುಧಾರಿಯೊಡು
ಉಪ್ಪು ನುಪ್ಪುಗು ಮರಿಯಲಾಂಡಲಾ ಬಾಯಿ ಬಂಗಾರಾತುಜಿ !!''
ಮಂಜಣ್ಣ ನ ಬಾಡಿ ಮೋನೆನ್ ತೂದು ,
''ಬಡಾವು ಬಾಜೆಲ್ ತೂಯಿನಾಯಗ್ ಧರ್ಮ ಕಡೆಸಂದೆ ಪೋಪುಜಿ
ಧಾನ ಧರ್ಮನೇ ದಾಂತಿ ಇಲ್ಲವು ಏಳಿಗ್ಯಾಪುಜಿ ಮಂಜಣ್ಣ !''
ದಾನ ಧರ್ಮ ಇಲ್ಲ ಏಳಿಗೆದ ಮುಟ್ಲುಲು ಪನ್ಪಿನವೆನ್ ಪೊರ್ಲುಡು ತೆರಿಪ ಕೊರ್ಪೆರ್.
''ಪತ್ತ್ ಜನೊಕ್ ಪನ್ಪಿನಾಯೆ ತನನ್ ತಾನೇ ತೆರಿಯೊಡು
ಒಟ್ಟೆ ತಿಪ್ಪಿಡ್ ನೀರ್ ಕನಯೆರೆ ಆಪುಜತ್ತ ಮಂಜಣ್ಣ !''
ಪಂಡೊಂದು ಬುದ್ದಿ ಪನ್ಪಿನಾಯನ ಯೋಗ್ಯತೆಗ್ ಜೀಟಿಗೆ ಪತ್ತುವೆರ್ !
''ಪೇರ್ ಪರ್೦ಡಲಾ ಸೈಪುಂಡುಗೆ ,ನನ ವಿಷೋನು ಪರ್ದು ಬದ್ಕೋಲ್ಯ
ಮಂಡೆ ಹಾಕ್ ದ್ ಮಲ್ತಿ ಬದ್ಕ್ ವು ದಂಡ ಆಪುಂಡು ಮಂಜಣ್ಣ !''
ಮಂಡೆ ಹಾಕುನ ಬದುಕುನು ಮಂಜಣ್ಣಗ್ ಜವ್ವನದ ಜಾಲ್ದೆ ಮಂಡೆಗ್ ಪೊಗ್ಗಾದೆರ್ ಬಗ್ಗಣ್ಣೆ !
''ನ್ಯಾಯ ಬುಡ್ದು ಅನ್ಯಾಯ ಮಲ್ಪಡ, ದೈವ ದೇವೆರೆ ಮರಪಡ
ಸ್ವಾಮಿ- ಭೂಮಿ ಮೆಚ್ಚಿನಂಗೆನೆ ನಡತೊಂದುಪ್ಪೊಡು ಮಂಜಣ್ಣ !''
ದೈವ ದೇವೆರೆನ ನಿರೇಲ್ಡ್ ಬದುಕೋಡಿನ್ಪಿ ಸತ್ಯೋನು ತೆರಿಪದೇರ್ ! ಅಂಗಲಾಪುದ ಅಲ್ಪೇಸಿ ಬದ್ಕ್ ಬದುಕಡ ಪನ್ಪಿನವೇನ್
''ಪಕ್ಕಿ ತಿಂದುದ್ ಒಕ್ಕೆಲ್ ಪೋವಂದ್ ಮೂ೦ಕುಡುಂಡುದು ಬಂಜರಾವಂದ್
ಊರ್ಯ ಬದ್ಕ್ ಡ್ ಆಸೆ ದೀವಂದೆ ಸುಕೊಟು ಬದುಕೊಡು ಯಾಪಲಾ !''
ಬಗ್ಗಣ್ಣ ಅಡ್ಯಂತಾಯೆರ್ ಮಂಜಣ್ಣನ ಮೋನೆನ್ ಅಂಗೈಟ್ ಮುಟುದು ದೆರ್ತುದು ಆಯನ್ ತರ್ತು ಪತುದು ನೆಸಲ್ ಮೂಸುವೆರ್ !
''ಸತ್ಯ ಧರ್ಮೊನು ದಂಟಿನಾಯನ್ ದೈವ ಮುನಿಯುಂಡು ಮಂಜಣ್ಣ ! ಪಂಜದಾಯನ ಪತ್ ಮುಡಿಯರಿ ನಂಕತ್ ,ಪಿರ ಕೊರ್ದು ಬಲ್ಲ'' ಪಂಡುದ್ ಕೊರ್ದು ಕಡಪುಡುವೆರ್ !
ನ್ಯಾಯದಿಂಜಿದಿ ತೇಲಾರ್ದ ಚಾವಡಿಡ್ ಬುದ್ದಿ ನಾಡ್ದು ಬುಲೆಯಿ ಮಂಜಣ್ಣೆ ಊರ ಜನೊಕುಲೆಗ್ ಮೋಕೆದ ಜಟ್ಟಿಯಾದ್ ಮೆರೆವೆ ! ಬಲ ದಾಂತಿನಕಲ ಕೈ ಕಾರ್ಗ್ ಕಸುವಾದ್ ಬೆರಿ ಕೊರ್ಪೆ . ಅಪ್ಪೆ ದುಗ್ಗೆಗ್ ಮಾಮು ಬಗ್ಗಣ್ಣ ಗ್ ಕುಂದೆಲಾವಂದಿಲೆಕ್ಕ ನಡತುದ್ ತುಳುನಾಡುಗ್ ಪುದರಾಪೆ . ತಂಕದ ಜವನೆರ್ ನಡಪು ಸಾದಿಗ್ ತುಡರಾಪೆ. ಬಂಟೆರ ಕೂಟೊಗು ತರೆತ್ರದ ತುಯ್ಯಾಪೆ !
ಮಾತಾ ಬಲ ಇತ್ತಿನಕುಲು ಮಂಜಣ್ಣನ ಸಾದಿಡ್ ನಡದುವೆರ್ಡ ಇನಿ ನಮ ನರಮಾನಿ ನಡತಿ ಸಾದಿಡ್ಲಾ ಪಜಿರ್ ಕೊಡಿದುವೋ ದಾನ್ಯೋ ?!
ಶಾಂತಾರಾಮ್ ಶೆಟ್ಟಿ ಬೆಂಗಳೂರು
